కో లివింగ్‌.. ఇన్వెస్ట్‌మెంట్‌ ట్రెండింగ్‌

- కో లివింగ్‌ హాస్టళ్లకు పెరుగుతున్న డిమాండ్‌

దేశంలో కో లివింగ్‌కు డిమాండ్‌ పెరుగుతోంది. ఇప్పటివరకు అభివృద్ధి చెందిన పెద్ద నగరాలకే పరిమితమైన ఈ రెంటల్‌ హౌసింగ్‌ విధానం ఇపుడు టైర్‌-2 నగరాల్లోనూ పెరుగుతోంది. హైదరాబాద్‌తో పాటు విజయవాడ, తిరుపతి, విశాఖపట్నం వంటి నగరాల్లో వీటికి డిమాండ్‌ ఊపందుకుంటోంది. 

నాస్కామ్ తాజా నివేదిక ప్రకారం విశాఖపట్నం, తిరుపతి, విజయవాడ వంటి నగరాలు కొత్త టెక్నాలజీ, ఎడ్యుకేషన్ హబ్‌లుగా ఎదుగుతున్నాయి. దీంతో ఆయా ప్రాంతాలకు యువ ప్రొఫెషనల్స్, విద్యార్థులు బాగా వస్తున్నారు. సౌకర్యవంతంగా ఉంటూనే, తక్కువ అద్దెకు లభించే వసతి సదుపాయాల కోసం వారు వెతుక్కుంటున్నారు. ఫలితంగా... అలాంటి సౌకర్యాలను అందిస్తున్న కో-లివింగ్ ప్రాజెక్టులకు ఆదరణ పెరుగుతోంది. సింగిల్ బెడ్రూమ్ అద్దెకన్నా సుమారు 35 శాతం చౌకగా, సరళతరమైన నిబంధనలతో లీజుకు తీసుకునేందుకు వీలుగా ఉండటంతో పాటు వై-ఫై, క్లీనింగ్, కమ్యూనిటీ కార్యక్రమాల్లాంటి హంగులెన్నో ఉంటుండటంతో జెన్ జెడ్ వీటివైపు మొగ్గు చూపుతోంది. 

హైదరాబాద్‌లో సాధారణ ట్రిపుల్ బెడ్రూమ్ ఫ్లాట్ అద్దె నెలకు రూ.25,000 ఉందనుకుంటే, ఆ ఇంటినే కో-లివింగ్ కింద (మూడు వేర్వేరు గదులుగా) మారిస్తే రూ. 30,000- రూ.40,000 వరకు వస్తోంది. సంప్రదాయ రెంటల్ విధానమైతే పెట్టుబడిపై వార్షికంగా సుమారు 2 నుంచి 3 శాతం మేర నికరంగా రాబడి లభిస్తుంటే... ఈ కో-లివింగ్ విధానంలో 5 నుంచి 7 శాతం రాబడి వస్తోంది. అదే ఎడ్యుకేషన్‌, టెక్నాలజీ సెంటర్లకు దగ్గర్లో ఉన్నవైతే కొన్ని సందర్భాల్లో 8 శాతం వరకు రాబడి ఉంటోంది. పైగా ఇలాంటి ప్రాపర్టీలను కో-లివింగ్‌ తరహాలో అద్దెకు ఇవ్వాలనుకునే యజమానుల తరఫున అన్ని పనులూ చూసుకునే నిర్వహణ ఏజెన్సీలు కూడా చాలా వస్తున్నాయి. దీంతో స్మార్ట్‌ ఇన్వెస్టర్లు కూడా ఈ కో లివింగ్‌ ప్రాజెక్టుల్లో పెట్టుబడులకు ఆసక్తి చూపిస్తున్నారు.