శంషాబాద్, ఓఆర్ఆర్.. రెండూ సూపర్

-      ఈ ప్రాంతాల్లో భూములకు అపూర్వ డిమాండ్

రియల్ ఎస్టేట్ రంగంలో హైదరాబాద్ జోరు కొనసాగుతోంది. ముఖ్యంగా మౌలిక వసతుల ప్రాజెక్టులు వేగంగా ముందుకు సాగుతున్న నేపథ్యంలో శంషాబాద్, ఓఆర్ఆర్ వెంబడి ఉన్న భూములకు అపూర్వమైన డిమాండ్ పెరుగుతోంది. మెట్రో పొడిగింపు నుంచి విమానాశ్రయ విస్తరణ వరకు పలు అంశాలు ఇందుకు దోహదం చేస్తున్నాయి. గత రెండు మూడేళ్లుగా శంషాబాద్, ఓఆర్ఆర్ వెంబడి ఉన్న భూముల ధరలు క్రమంగా పెరిగాయి. కొన్ని సూక్ష్మ మార్కెట్లు రెండంకెల వృద్ధిని సాధించాయి. విమానాశ్రయం, లాజిస్టిక్స్ హబ్‌లు, ప్రతిపాదిత మెట్రో మార్గాలకు దగ్గరగా ఉన్న ప్రదేశాలు అత్యంత వేగంగా అభివృద్ధి చెందాయి. 

శంషాబాద్ వృద్ధికి కేంద్రంగా రాజీవ్ గాంధీ అంతర్జాతీయ విమానాశ్రయం ఉంది. ఇప్పటికే దేశంలో అత్యంత రద్దీగా ఉండే విమానాశ్రయాలలో ఒకటిగా ఉన్న నేపథ్యంలో దీనిని మరింత అప్ గ్రేడ్ చేస్తున్నారు. అలాగే ఎయిర్ పోర్ట్ వరకు మెట్రో రైలు పొడిగింపు.. నేరుగా గచ్చిబౌలి, హైటెక్ సిటీ వంటి ఐటీ హబ్ లకు కలపడం మరింత ఆకర్షణీయంగా మారింది. దీంతో విమానాశ్రయ కారిడార్ సమీపంలోని ఇళ్ళు, హోటళ్ళు, వాణిజ్య రియల్ ఎస్టేట్, గిడ్డంగులకు డిమాండ్‌ పెరిగింది. వాస్తవానికి తొలుత శంషాబాద్ లో పెట్టుబడిదారులు, ల్యాండ్ బ్యాంకర్లు దృష్టి పెట్టి భూములు కొన్నారు. దీంతో ధరల పెరుగుదల ప్రారంభమైంది. తర్వాత క్రమంగా సామాన్య కొనుగోలుదారులు కూడా ప్రవేశించడంతో శంషాబాద్ రియల్ బూమ్ ఊపందుకుంది. ముఖ్యంగా ఎయిర్ పోర్టులో పనిచేసేవారు, ఓఆర్ఆర్ వెంబడి ఉన్న ఐటీ హబ్ లలో పనిచేసే నిపుణులతోపాటు మధ్య హైదరాబాద్ తో పోలిస్తే కాస్త అందుబాటు ధరలో ఇళ్లు చూస్తున్న కుటుంబాలు ఈ ప్రాంతాల వైపు మొగ్గు చూపాయి. ఇది గమనించిన డెవలపర్లు కూడా ఇక్కడ ప్లాటెడ్ డెవలప్ మెంట్ నుంచి గేటెడ్ కమ్యూనిటీల వరకు అనేక రెసిడెన్షియల్ ప్రాజెక్టులు ప్రారంభించారు. అలాగే గిడ్డంగులు, లాజిస్టిక్స్ పార్కులు, బడ్జెట్ హోటళ్ళు విమానాశ్రయ కారిడార్ చుట్టూ పుట్టగొడుగుల్లా పట్టుకొచ్చి శంషాబాద్ రూపురేఖలు మార్చేశాయి. 

శంషాబాద్ రాబోయే దశాబ్దంలో హైదరాబాద్ యొక్క వృద్ధి కారిడార్లలో ఒకటిగా ఉద్భవిస్తుందని.. ఇది స్థిరమైన విమానాశ్రయ ట్రాఫిక్, లాజిస్టిక్స్ డిమాండ్, మెరుగైన ప్రజా రవాణా ద్వారా కీలక ప్రాంతంగా మారుతుందని నిపుణులు అభిప్రాయపడుతున్నారు. అదే సమయంలో శంషాబాద్ మరింతగా అభివృద్ధి చెందాలంటే.. ఆసుపత్రులు, పాఠశాలలు, రిటైల్, పౌర సౌకర్యాలు రియల్ ఎస్టేట్ బూమ్‌తో వేగాన్ని కొనసాగించాలని చెబుతున్నారు. హైదరాబాద్ రియల్ ఎస్టేట్ ఎల్లప్పుడూ మౌలిక సదుపాయాల ఆధారిత వృద్ధిపైనే ముందుకెళ్లిందని.. శంషాబాద్ దీనికి తాజా ఉదాహరణ అని పేర్కొంటున్నారు.